鮑魚金腿雞湯

每年農曆新年前，我都習慣會去上環咸魚欄海味舖辦下年貨。上次去買了幾隻青邊鮑回家，一直放了幾個月都未有時間煮，趁住復活節一連五日長周末假期，終於煲了鮑魚湯慰勞一家人。歲半的小姪女都飲到不能停口！

今次材料非常豐富，除了滋陰的澳洲青邊鮑外，還有甘香的金華火腿；冬菇、螺頭和瑤柱則令湯更清甜；魚唇充滿骨膠原，味道和口感有點似花膠，加入它和竹笙，飲湯時有不同口感。用壓力煲煲三十分鐘（大約等如正常三小時），放壓後再煲多半小時，味道濃郁到不得了，鮑魚味加上金華火腿香，真是絕配！

青邊鮑買了四隻，每隻大概半個手掌大，才五百幾元，算幾抵，可以分兩次用。之後經過超市，見到同樣是澳洲青邊鮑，只是大一點，兩隻就賣八百幾元，所以要買真的要去咸魚欄買，選擇多價錢也合理。

材料：

青邊鮑 - 兩隻
竹絲雞 - 一隻
瘦肉 - 一塊（切開幾塊備用）
金華火腿 - 適量
乾螺頭 - 數粒
乾魚唇 - 數片
冬菇 - 數隻
瑤柱 - 適量
竹笙 - 數棵
紅蘿蔔 - 一個
杞子 - 適量
果皮 - 兩片

出過水的青邊鮑和魚唇

冬菇、瑤柱、杞子、果皮、瘦肉、竹絲雞

出過水的魚唇和金華火腿

做法：

1) 乾螺頭、乾魚唇、冬菇、瑤柱分別浸水數小時至軟身。螺頭切小塊，以便出味。冬菇去腳。浸過冬菇和瑤柱的水留後使用。

2) 竹笙浸水一小時，期間換幾次水，擠出霉 up 味，切成小丁備用。

2) 杞子、果皮同浸水十五分鐘就可以。

3) 青邊鮑解凍後，用牙刷洗乾淨旁邊青黑色漬；竹絲雞原隻洗淨；金華火腿和浸軟的魚唇 - 將前逑材料全部用薑出水。

4) 出水後的金華火腿切開幾塊，容易出味。

5) 紅蘿蔔去皮切件。

6) 煲滾水後（我用的壓力煲是 6 公升），放入所有材料（除了竹笙、魚唇和杞子）。煲滾後開始加壓，用中火煲三十分鐘，熄火後移離爐頭減壓。

7) 打開煲蓋後，加入之前的冬菇瑤柱水，還有竹笙、魚唇和杞子，開火再煲多半小時，最後撇去面頭油脂，一道美味的靚湯即成。（由於金華火腿本身已有咸味，所以不用再下鹽）

8) 煲過的鮑魚千萬不要浪費，切片後佐以豉油和麻油，仍然十分林甜。又或者像我，可以用蒜頭炒香芽菜，下鮑魚片略炒，用蠔油和鹽調味，又多味餸！連用假牙的媽媽都讚好！

芽菜炒鮑片